राष्ट्रिय स्वतन्त्र पार्टी (रास्वपा)की समानुपातिक सांसद ज्वाला भनेर चिनिने टीका संग्रौला र उनका श्रीमान् हिमाल उपाध्याय फेरि विवादमा तानिएका छन्।

सामाजिक सञ्जालमा राजनीतिक विषयमा टिप्पणी गर्दै आएका लमजुङ राइनासका हरि पौडेललाई हिमालले म्यासेन्जरबाट सम्पर्क गरी फोनमा गालीगलौज र धम्कीपूर्ण भाषा प्रयोग गरेको आरोप लागेको छ। पौडेलका अनुसार हिमालले सुरुमा ‘ओइ हेलो’ भन्दै म्यासेज पठाएका थिए र कल उठ्न नसकेपछि आफूले कलब्याक गर्दा सुरुमै तथानाम गाली गर्दै आफू कहाँ रहेको र घर कहाँ भएको भन्दै सोधेका थिए। कुराकानी चर्किएपछि ‘भेट्न आइज’, ‘तेरो छाती छ भने भन’ भन्दै २० मिनेटमै आउने शैलीमा थर्काएको पौडेलको दाबी छ। आफूले हिमाललाई नचिनेको र फेसबुकमा समेत साथी नरहेको उनको भनाइ छ। पछि प्रोफाइल हेर्दा उनी सांसद ज्वाला संग्रौलाका श्रीमान् भएको थाहा पाएको पौडेलले बताएका छन्। पौडेलले आफू हिमाललाई व्यक्तिगत रूपमा नचिनेको र राजनीतिक विषयमा सामाजिक सञ्जालमा टिप्पणी गर्दै आए पनि व्यक्तिगत आक्षेप नलगाउने बताउँदै आएका छन्।

पौडेल सामाजिक तथा राजनीतिक विषयमा टिप्पणी गर्दै आएका व्यक्ति हुन्। आफू जेनजी आन्दोलनमा सक्रिय रहेको र सामाजिक सञ्जालबाट सरकारलाई खबरदारी गर्दै आए पनि व्यक्तिगत रूपमा कसैलाई आक्षेप नलगाउने उनको दाबी छ। राजनीतिक टिप्पणीका कारण आफूलाई तर्साउन खोजिएको हुनसक्ने उनको आशंका छ। यही घटनाले अहिले अर्को प्रश्नसमेत उठाएको छ—सार्वजनिक पदमा रहेकी सांसदका श्रीमान् किन सामाजिक सञ्जालमा टिप्पणी गर्ने सर्वसाधारणलाई फोन गर्दैछन्? आरोप सत्य भए के त्यो व्यक्तिगत विवाद हो वा राजनीतिक पहुँच देखाएर आलोचकलाई दबाब दिने प्रयास? यसको जवाफ सम्बन्धित पक्षले दिनुपर्ने देखिन्छ।

ज्वाला संग्रौलाको राजनीतिक पृष्ठभूमि पनि विवादमुक्त छैन। जापानबाट फर्किएपछि विभिन्न विवादमा परेकी उनी विगतमा पक्राउसमेत परेकी र मुद्दा खेपेकी थिइन्। पछि रास्वपाबाट समानुपातिक सांसद बनेकी उनले पिछडिएको क्षेत्रबाट सांसद बन्न अछामबाट नागरिकता लिएको विषयमा समेत आलोचना खेपेकी थिइन्। उनका श्रीमान् हिमालविरुद्ध भने लिखतसम्बन्धी किर्ते मुद्दामा अदालतबाट दोषी ठहर भई कैद तथा जरिवानाको फैसला भएको दाबी गरिएको छ। त्यसबाहेक ठगी तथा आपराधिक विश्वासघातसँग सम्बन्धित अर्को मुद्दामा समेत उनको नाम जोडिएको र सो प्रकरणमा अदालतबाट पक्राउ पुर्जी जारी भएको उल्लेख छ। ती विषयमा मुद्दाको पछिल्लो कानुनी अवस्था भने सम्बन्धित आधिकारिक अभिलेखबाट पुष्टि गर्नुपर्ने हुन्छ।

यही पृष्ठभूमिमा रास्वपा नेतृत्वसँग हिमालको निकट सम्बन्ध रहेको र राजनीतिक पहुँचकै कारण उनी कानुनी कारबाहीबाट जोगिएको आरोपसमेत उठाइएको छ। सामग्रीमा अनुसन्धानमा रहेको एउटा प्रकरण ‘मिलाइदिने’ भन्दै रकम उठाएको आरोप, केही व्यक्तिको बयान, रकम बाँडफाँट र हिमाल अदालतमा उपस्थित नभएको प्रसंगसमेत उल्लेख गरिएको छ। पछि उक्त मुद्दा फिर्ता भएको दाबीसमेत गरिएको छ। तर यी सबै विषयमा जाहेरी, बयान वा आरोपलाई अदालतबाट प्रमाणित दोषसिद्धि मान्न मिल्दैन। त्यसैले अहिलेको सबैभन्दा ताजा र गम्भीर प्रश्न भनेको हरि पौडेललाई गरिएको भनिएको फोन हो—राजनीतिक टिप्पणी गरेकै कारण सर्वसाधारणलाई फोन गरेर थर्काइएको हो भने नयाँ राजनीतिको नाममा पुरानै ‘पहुँचको राजनीति’ दोहोरिएको त होइन?

श्रीमती संसदमा आक्रामक अभिव्यक्ति दिने, सामाजिक सञ्जालमा विवादास्पद लेखाइ गर्ने र श्रीमान् आलोचकलाई फोन गरेर थर्काउने हो भने—यो कस्तो ‘नयाँ राजनीति’ हो? यही प्रश्नले अहिले रास्वपाका यी ‘माननीय दम्पती’लाई फेरि चर्चाको केन्द्रमा ल्याएको छ।

पुरा विवरण जन आस्थामा हेर्न सक्नु हुने छ।

माननीय दम्पत्ती नै थर्काउनमा अगाडि

फरार पतिको मुद्दा मिलाइयो त ज्वाला म्याम ?